АКШнын президенти Дональд Трамп Украинанын президенти Владимир Зеленскийдин дүйшөмбүдө Вашингтонго сапарында үч тараптуу жолугушуу макулдашылышы ыктымал экенин билдирди.
Үч тараптуу жолугушуу - Трамп, Зеленский жана Орусиянын президенти Владимир Путиндин катышуусунда өтүшү мүмкүн. Анда Украинадагы согушту толук токтотуу маселеси талкууланат.
"Согуштун токтошу көп учурда сакталбаган элдешүүгө караганда артык экенине баары макул болушту", - деп жазды Трамп Truth социалдык түйүнүнө Анкорижге сапарынан кийин Зеленский, Евробиримдик, НАТОнун лидерлери менен сүйлөшүүлөрдүн жыйынтыгы тууралуу.
Трамп Путин менен жолугушууну "өтө мыкты" деп баалап, Зеленский менен Путиндин жолугушуусу миңдеген кишинин өмүрүн сактап калышы ыктымал экенин айтты. Башка маалымат берген жок.
Анкориждеги сүйлөшүүлөрдөн кийин Трамп ЕБ, Британия, НАТО лидерлери жана Зеленский менен телефондон баарлашкан. Андан кийин Брюсселде Евробиримдиктин элчилеринин чукул жыйыны чакырылган, Германияда өкмөт кезексиз отурумга чогулган.
Буга чейин Аxios сайтынын кабарчысы Барак Рави Анкориждеги жолугушууда Путин убактылуу жарашууга көнбөй, анын ордуна согушту биротоло токтоткон келишим түзүүнү сунуштаганын кабарлаган.
The Economist басылмасынын журналисти Оливер Кэролл өз булактарына таянып, Москва Зеленский, Трамп жана Путиндин үч тараптуу жолугушуусуна чейин Украинада абадан соккуларды токтотууга макул болгонун кабарлаган.
Бул маалымат расмий тастыктала элек.
Трамп-Путин жолугушуусу 15-августта өттү.
Европа Биримдигине кирген өлкөлөрдүн элчилери Дональд Трамп менен Владимир Путиндин жолугушуусунан кийин Украинадагы кырдаалга байланыштуу Брюсселде шашылыш жыйынга чакырылды. Буга чейин ЕБдин лидерлери саммитти АКШнын президенти менен телефондон талкуулаган.
Трамп менен Еврокомиссиянын башчысы Урсула фон дер Ляйен, Польшанын, Финляндиянын, Франциянын президенттери жана Германиянын канцлери сүйлөшүшкөн.
АКШ менен Орусия Алясканын борбору Анкориж шаарында өткөн саммитте жетишилген макулдашуулар боюнча расмий маалымат беришкен жок. The Economist басылмасынын кабарчысы Оливер Кэроллдун билдиришинче, Москва Путин, Трамп жана Зеленскийдин үч тараптуу жолугушуусуна чейин Украинада аба аркылуу ок атышпоого макул болгон. Ал эми Axios басылмасынын кабарчысы Барак Равинин айтымында, Путин убактылуу ок атышпоого көнбөй, анын ордуна түз эле согушту токтотуу боюнча келишимге келүү сунушун берген.
Бул маалымат расмий ырастала элек. Ошондой эле кабарчылар иштеген басылмалар азырынча бул тууралуу кабар тараткан жок.
Дональд Трамп менен Владимир Путин 15-августта Анкориж шаарында жолугушкан. Жолугушуудан кийин алар кыска маалымат жыйынын өткөрдү. Трамп жолугушууну “жемиштүү өттү” дегени менен “келишимге” келе алышпаганын айтты.
Бирок Путин маалымат жыйында сүйлөшүү учурунда тараптар “келишимге келди” деп бир нече жолу белгиледи. Эки лидер тең журналисттердин суроолоруна жооп берүүдөн баш тартты.
Кыргызстандын Орусиядагы элчилиги Фейсбуктагы расмий баракчасына Москвада Украинадагы согушка алданып кетип кала жаздаган Кыргызстандын жараны тууралуу видео чыгарды.
Анда атын ачык атабаган жигит төрт ай мурун Саха (Якутия) Республикасына иштегени келгенин, 14-августта аны Москвага акы төлөнүүчү аскердик кызматка чакырып, андан ары согушка жөнөткөнү жатканын айткан. Ал Кыргызстандын Орусиядагы элчилигине байланышып, элчиликтин кызматкерлери аны аскер бөлүгүнөн алып чыгып кеткенин, бул үчүн аларга ыраазылык билдирерин кошумчалаган.
10-апрелде Украинанын “Хочу жить” долбоору Орусия тарапта украиндерге каршы согушту деген 360 кыргызстандыктын аты-жөнүн жарыялаган. Долбоордун маалыматы боюнча, алардын кеминде 38и каза болгон. “Хочу жить” бул тизме орус армиясынын атын атагысы келбеген өкүлдөрүнөн алынганын кабарлаган.
“Азаттык” буга чейин Украинадагы согушта теги кыргызстандык кеминде 70 адам набыт болгонун өз алдынча аныктаган. Алардын басымдуу бөлүгү кыргыз жарандары. Арасында кыргыз атуулдугунан тышкары орус паспортун алып жүргөндөр же Кыргызстанда туулуп-өсүп, кийин толук Орусиянын жарандыгына өткөндөр бар.
Кыргызстандын Кылмыш-жаза кодексинин 256-беренесинде (“Кыргыз Республикасынын жаранынын чет мамлекеттин аймагындагы куралдуу жаңжалдарга же согуш аракеттерине катышуусу же террордук актыны жасоо үчүн даярдыктан өтүүсү”) чет өлкөлөрдөгү согуштарга же аскердик чыр-чатактарга чакыруу, уюштуруу, каржылоо, азгыруу иштери же ага жалданып катышканы үчүн кылмыш жоопкерчилиги каралган
Буга чейин Украинадагы согушта Орусиянын армиясынын катарында согушка катышкан Кыргызстандын жарандары сот жообуна тартылган окуялар болгон.
Трамп менен Путиндин жолугушуусу маалында дрон чабуулу уланды
Украинанын Аба күчтөрү 16-августка караган түнү орус аскерлери “Искандер-М” ракетасы жана 85 “Шахед” дрондору, мындан тышкары ар кандай учкучсуз учактар менен сокку урганын билдирди.
Маалыматта абадан коргонуу күчтөрү өлкөнүн түндүгүндө жана чыгышында 61 учкучсуз учакты атып түшүргөнү айтылат.
"Ракета жана 24 учкучсуз учак 12 локацияга тийди", - деп жазылган маалыматта.
Орусиянын Коргоо министрлиги Москва убактысы боюнча түнкү саат 00:00дөн таңкы үчкө чейинки аралыкта абадан коргонуу күчтөрү украиналык 29 учкучсуз учакты атып түшүргөнүн жарыялады. Дрондор Ростов облусу жана Ставрополь крайынын аймагын жок кылынганы кабарланды.
Бул чабуулдар маалында Альясканын Анкориж шаарында АКШ президенти Дональд Трамп жана орус президенти Владимир Путиндин жолугушуусу өтүп жаткан.
2022-жылы Украинада согуш башталганы АКШ менен Орусиянын президенттери биринчи жолу жолугушту. Трамп менен Путиндин ар бир тараптан үчтөн киши катышкан сүйлөшүүсү дээрлик үч саатка созулду. Жолугушуудан кийинки басма сөз жыйынында эки лидер бири-бирин мактап, так бир жыйынтык тууралуу айткан жок.
Путин сүйлөшүүнү "натыйжалуу болду" деп, АКШны "төрт гана чакырым бөлүп турган" Орусиянын жакшы "коңшусу" деп атады. Трамп эки тарап "толук түшүнүшүүгө жете албагандыктан макулдашуу да болбогонун" айтты. Ал жолугушууну "өтө майнаптуу" деп, Орусия менен АКШ Украинадагы согуш боюнча көп пункттарды макулдаша алганын билдирди.